Hezîran 2021 Abonetî Piştgirî  fransî | îngilîzî | almanî | edîsyonên dîn

rojnamegerîya rastîn, ramana azad
—zanyarîyên bêlayan, analîzên rexneyî

Timur Çelik

Wênesaz Timur Çelik, di 1960î de li Stenbolê ji dayik bûye, ji malbateke kurdên elewî yê Gümüşhaneyî ye. Perwerdeya xwe ya hunerê di 1984an de li Stenbolê li Unîversîteya Marmarayê temam kirîye.

Ji 1993yan vir ve li Berlînê dijî û xebatên xwe yên hunermendîyê li vî bajarî didomîne. Mijara bajarê hunermend ku der e, tenê bi serê xwe çîrokek e. Horasan, Dersîm, Erzîngan, Gümüşhane û rawestgeha dawîn Berlîn. Ev paşxaneya etnîkî, dînî û kulturî ya hunermend Timur Çelikî, di afirandina berhemên wî de mijareke girîng e.  Ew di pêvajoya lêgerîna koka xwe ya etnîkî de, dikeve nava kûrahîya hunera wênesazîyê û têgeheke nû ya hunerîyê diafirîne.

[emember_protected]

Wêneyên wî di nêrîna ewil de wekî sade û ji rêzê xuya dikin, lê dema meriv bi hûrgilî û bi nêrîneke pisporî lê binêre hostetîya hunermend tê dîtin. Hunermend di berhemên xwe de rewşên kompleks; tiştên ku bi dest tên girtin, bi çav tên ditîn û gotinên devkî yên di nav gel de belav dibin, bi kar tîne. Di heman demê de dîyardeyên rojane, tiştên li kuçeyan dibîne û merivên derdora xwe jî dike mijara wêneyên xwe. Ew berhemên xwe bi têgeha xwe ya estetîkî ve dinexşîne û bi awayekî sade digihîjîne temaşevanên xwe. Hunermend Timur Çelik di huner û berhemên xwe de felsefe û pêşengîya jîyana civatî têkelhev dike. Helwesta wî ne li gorî sînorên pîyasaya hunerê û xwedîyên galerîyên mezin e, li dijî sîstemê derdikeve, helwesteke li gorî nirxên mirovîyê digire.

Hunermend Timur Çelik  li gel portreyên mezin ên merivan, wêneyên piçûk ên rê, zevî û  bûyerên li cografyaya me diqewimîn jî bi perspektîfeke balkêş çêdike. Bi van xebatên xwe helwesta xwe ya li dijî sîstemê destnîşan dike. Ji rêzewêneyên wî yên bi navê ‘’Eyewitness’’ ango şahidê bûyerê xebata wî ya ‘’Helîkopter’’ di vê mijarê de mînaka herî balkêş e. Zilma 1000 salî tenê di wêneyekî 30 cm de bi hostetî dîyar dike.

Hinek rexnegir wêneyên Timur Çelik wekî ji ‘’hestyarîyê dûr’’ dinirxînin, lê ez berevajî vê nirxandinê difikirim. Ger port-reyên wî yên bi navê Birol, Hannah, Thomas, Oktay, Brian, Till û Viron bi hûrgulî bên nirxandin dê bê ditîn ku berhemên gelek hestyar in. Taybetmendîyên wan ên hevpar ev in; metropol, jîyaneke lezgîn, alozî, têkçûn û li dijî sîstemê serhildan.

Hunermend di portreyên xwe de rengên wekî pembe, sor, rengê çerm û goştî bi kar tîne. Ev  tercîha wî, rengên portreyên Paula Modersohn-Becker bi bîr tîne. Ji ber vê sedemê ez dixwazim bi gotina Paula Modersohn-Becker ku bi wêneyên Timur Çelik re jî li hev tê biqedinim: ‘’Ez hestên di hundirê xwe de wekî teşeyek zirav a bêdeng, lêdanên baskên xwe, bêhnvedenake lerzok û nefesgirtinekê hîs dikim. Ger ez rojekê bikaribim wêne çêkim, ez ê wê jî birengînim’’ 

Hasan Hüseyin Deveci

Wergera ji tirkî:

Nedim Baran

[/emember_protected]

Galerî / Timur Çelik

[emember_protected]

[/emember_protected]

Hemû gotarên nivîskar

+ Hemû gotarên nivîskar
Social media & sharing icons powered by UltimatelySocial