Tîrmeh 2021 Abonetî Piştgirî  fransî | îngilîzî | almanî | edîsyonên dîn

rojnamegerîya rastîn, ramana azad
—zanyarîyên bêlayan, analîzên rexneyî

Paşa İmrek

Wênegirê vê hejmarê Paşa İmrek li navçeya Hêlwanê [Cirnêreş] ya li ser bajarê Rihayê ji dayik bûye. Perwerdeya xwe ya bilind li fakuteya çandînîyê temam kirîye. Dû re dest bi xwendina civaknasîyê (sosyolojî) kirîye. Lê perwerdeya xwe ya civaknasîyê temam nekirîye.
Hunermend Paşa İmrek bêyî ku li ser hunerê perwerde bibe dest bi karê wênegirîyê kirîye. Ew bi tecrûbeyên xwe bûye hunermendekî serkeftî û ji bo sazî û platformên cihêreng wekî derhêner û wênegir xebitîyê. Îmrek, karê xwe yê wênegirîyê wekî endamê MEFSAD (Rêxistina Amatorên Wênegir û Sînemayê ya Mezopotamyayê), Koma Wênegiriyê ya RED û wekî wênegirekî serbixwe didomîne.


Berhemên wî mijarên civakî û realîst in. Ew bi kameraya xwe ya analog li kolanan digere û wêneyan digire. Wêneyên wî di gelek kovar û rojnameyên wekî Kovara National Geographic û Kovara IZZ de hatine belavkirin û ew bi berhemên xwe li nav welat û derveyî welat beşdarî gelek pêşangehan bûye û xelat wergirtine. Herweha wî gelek pêşangehên şexsî jî li dar xistîye.

 
Di nav berhemên wî de yên herî balkêş wêneyên koçber û penaberên di pêvajoya şerê navxweyî ya Sûrîyeyê de li ser sînoran kombûyî ne. Wî şahidîya dramayên koçber û penaberên Sûrîyeyî û ji rojavayê Kurdistanê yên li ser sînor û bajarên ji konan avabûyî, kirîye û rewşa wan ji nêz ve şopandîye. Ew li dû rewşa şerê Kobanîyê çûye Kobanîyê bi deklanşora xwe kavilbûna Kobanîyê raxistîye ber çavan. Hunermend Imrek di hevpeyvîneke xwe de hestên xwe yên wan rojan wisa tîne ziman: “Min gelek wêneyên penaberên ku bi destpêkirina şerê Sûrîyeyê re herikîn Tirkiyeyê kişand. Penaber ji ber polîtîkayên hikûmeta Tirkîyeyê bi rojan li deverên mayinkirî li benda derbasbûnê man.

 
Di wê demê de, gelek kesan ji sedema mayînan jiyana xwe ji dest dan. Li ber çavên min, du bira û pismamek, pê li mayinekê kirin û jiyana xwe ji dest dan. Mixabin min bi deklanşora xwe şahîdîya vê bûyerê kir. Ev wêne yek ji wêneyên min ê herî girîng e. Min ji wêneyên dramayên penaberan 10 wêne hilbijartin û beşdarî pêşwazîya navneteweyî ya Sonnyê bûm, bi van wêneyan ez ji bo fînalê hatim hilbijartin û min xelat wergirtin.”

 
Çend mînak ji pêşangehên kesane yên ku wênegir Paşa İmrek li dar xistine ev in;


“Deq” Enstîtûya Kurdî ya Parîsê, Paris-Fransa,
“Koçer” Can baste art house, Barcelona-Spanya,
“Dibistanek li Kobanîyê” Barr Objektif Festivala, Bourdeaux-Fransa,
Pêşangeha dîjîtal a “Şer û koçberî” Somerset House, London-England.

 

 

Galerî / Paşa İmrek

[emember_protected]

[/emember_protected]

Hemû gotarên nivîskar

+ Hemû gotarên nivîskar
Social media & sharing icons powered by UltimatelySocial