Gulan 2021 Abonetî Piştgirî  fransî | îngilîzî | almanî | edîsyonên dîn

rojnamegerîya rastîn, ramana azad
—zanyarîyên bêlayan, analîzên rexneyî

Vorheriger ArtikelRojnivîsa Thorez
Nächster ArtikelFelaket û piştre?

Êş û kedera filistînîyan

Li Filistînê, nêzîkbûna fermî ya di navbera Mîrekîyên Ereb ên Yekbûyî (MEY), Bahreyn, Sûdan û Îsraîlê de bû sedema pêleke rexneyên tund. Ev rexne li gor hisên «bitenêhiștinê» ne, ku bi salane bûye sedema êș û kederê. Serokê Desthilata Filistînî (DF) birêz Mahmoud Abbas, ji Şerîaya Rojava radigihêne, ku ji ber «îxanet»a her du monarșîyên Kendavê, mafê wan tuneye ku «li ser navê gelê filistînî» bipeyivin û tevî îradeya filistînîyan li ser qedera wan biryarê bidin. Ji alîyê din ve, birêz Şibrîl Rajoub, sekreterê giștî yê komîteya navendî ya Fetehê, partîya birêz Abbas ku îskeleta DFyê pêk tîne, vê yekê wekî kiryareke «bêrûmetker ku meriv ji ber șerm bike» dinirxîne. Birêz Nebîl Şeet, berpirsekî payebilind ê Rêxistina Rizgarîya Filistîne (RRF), șêwirmendê taybetî yê birêz Abbas û wezîrê berê yê Karên Derve, van lihevkirinên asayîkirina têkilîyan wekî «derbeke xencerê ya ji paș de» bi nav dike û tehdîda «întifadayeke sêyem» dike. Tevgera Îslamî Hemas, ku li șirîta Xezayê li ser hikim e, Ebû Dabî û Manamayê tawanbar dike û dibêje wan «çekeke vala pêșkêșî» Îsraîlê kirîye ku ew dagîrkerîya xwe bidomîne. Di hevpeyvîneke balkêș de, balyozê Filistînê yê Fransayê, birêz Selman El-Herfî jî, li ser navê xwe xwest hemî nerazîbûna xwe nîșan bide û got: bi bawerîya min Mîrekîyên Yekbûyî niha «rûyê xwe yê rastîn nîșan dan» û heta «ji îsraîlîyan bêtir bûn îsraîlî»([1]). Di encamê de, filistînîyan, bi yek dengî «sîyaseta kirêt» a Sûdana ku demeke dirêj bê tawîz piștgirîya doza wan dikir «rûreș» kirin.

Li ser saheyê, artêșa îsraîlî bawer dike ku per û bask pê ve hatine. Li gor raporeke RRFyê, di navbera 15ê îlonê (roja îmzekirina peymanên Abraham di navbera Mîrekîyên Yekbûyî, Bahreyn û Îsraîlê) û 15ê çirîya pêșîn de, li nav erda dagîrkirî artêșê 240 carî teqe kirîye. Di encamê de, du filistînî kuștine û li dor sedî jî birîndar kirine, li dor 500 kesî jî girtine ku di nav wan de zarok hene, herweha 370 carî girtîye ser malên xelkê û gelek avayî wêran kirine([2]).

Olivier Pironet

Wergera ji fransî: Yaqûp Karademîr

[1] Li hevpeyvîna Armin Arefi ya binavê «L’Ambassadeur de Palestine tire à boulets rouges sur les Émirats   / Balyozê Filistînê kevirên mezin bi ser Mîrekîyên yekbûyî de gêr dike» binêre, Le Point, Paris, 12ê çirîya pêșîn a 2020.

[2] «PLO: Israel attacks escalate after normalisation with Arab states / RRF: Piștî asayîkirina têkilîyên xwe bi welatên ereban re Îsraîlê êrîșên xwe pir kirin », Middle East Monitor, 24ê çirîya pêşîn 2020î, www.middleeastmonitor.com

Hemû gotarên nivîskar

+ Hemû gotarên nivîskar
Social media & sharing icons powered by UltimatelySocial